ஹைக்கூ - கிராமிய வாழ்வியல்

ஹைக்கூ - கிராமிய வாழ்வியல்

#1. காட்டுப்பக்கம் போக

நடுங்குது உசுரு

மனித மிருகங்கள்

#2.  கண்டாங்கிச்

சேலை வியப்பு

இரவு ஆடை இளசுகள்

# 3. ஆத்தோரம்

சலசலப்பு

மணல் வண்டி வரிசை

# 4. கரிசல் காட்டில்

கைகலப்பு

கைப்பேசிக் களவு

# 5. கயல்விழி

கடுகடுத்தாள்

கருவாடு விற்கவில்லை

# 6. முறை மாமன்

பரிசத்துக்கு பரிசளித்தான்

வலைத்தொடர்பு சாதனம்

#7. சின்னானோட

வண்ணப் பொட்டுக் கடையிலே

மின்னும் கைப்பேசி உறை

#8. காணொளியில்லா

பேருந்து காத்தாடுது

காராயிப்பட்டியிலே

# 9. ஆராயிக் கெழவிக்கு

தீராதாக் கோவம்

நாடகத்து நடுவுல மின்வெட்டு

#. 10. சிறுதானியம் ..சிறுகுறிப்பு எழுது

பட்டணத்து பள்ளியில் பண்ணையார்ப்

பேரன் ..பதில் தெரியாமல் ..

# 11. மல்லிகைத் தோட்டத்தில்

மயக்கும் மணம்

பூச்சி கொல்லி மருந்து

#12. கம்பி வேலிகளுக்குள்

எம்பிப் பார்க்கும்

மனை விற்பனைப் பலகைகள்..

# 13. காலையில்  கதிரறுப்பு ..

மாலையில் மனைத் திறப்பு

சாலையோரத் தோரணங்கள்

# 14. கோயில் திருவிழா

கையில் குப்பி நிறைத்த

மிளகு உப்பிட்ட சோளம்

# 15. கம்பு சோளம் தினை

வரகு கேப்பை சாமை

புதிர் போட்டிச் சொற்கள்